Japonia njihet globalisht si një nga vendet më të pastra dhe më të organizuara, por një pyetje e përsëritur nga turistët është pse nuk ka kosha mbeturinash në rrugët publike?

Profesori Chris McMorran nga Universiteti Kombëtar i Singaporit, ekspert për studimet japoneze, thotë se kjo është një veçori e pazakontë që habit shumë vizitorë perëndimorë.

“Studentët e mi gjithmonë pyesin pse mungojnë koshat në rrugë, veçanërisht pasi vendi duket kaq i pastër”, thotë ai.

Sipas një raportimi të CNN, një sondazh i organizuar nga Organizata Kombëtare e Turizmit të Japonisë (JNTO) tregoi se mungesa e koshave ishte sfida më e madhe për 22% të turistëve që vizituan vendin në vitin 2024 — madje më shqetësuese se barriera gjuhësore apo mbipopullimi në destinacionet kryesore.

Arsyeja kryesore lidhet me kulturën dhe etikën e japonezëve. Konsumimi i ushqimit në rrugë konsiderohet sjellje e pahijshme; madje, disa qytete e kanë ndaluar zyrtarisht. Shumica preferojnë të marrin ushqimin me vete në shtëpi apo në zyrë dhe atje të hedhin mbeturinat.

Nëse hanë jashtë, ata mbajnë me vete qese të vogla për mbeturinat, derisa të gjejnë një vend të përshtatshëm për t’i hedhur.

Megjithatë, rritja e turizmit ka sjellë sfida të reja. Në qytetin historik të Narës, ku jetojnë edhe drerë të egër që tërheqin turistë, mungesa e koshave është kthyer në një problem serioz.

Në vitin 2019, nëntë drerë vdiqën pasi kishin ngrënë plastikë të hedhur nga vizitorët. Koshat ishin hequr që në vitin 1985 për të parandaluar që drerët të ushqeheshin prej tyre, por me rritjen e numrit të turistëve, qyteti vendosi të instalojë disa kosha në zonat më të frekuentuara, të shtypur me mesazhin: “Ruaj drerët”.

Edhe në Tokio, lagjja Shibuya ka ndërmarrë masa të rrepta për të kontrolluar mbeturinat, duke ndaluar konsumimin e alkoolit në rrugë dhe duke rregulluar festimet e Halloween-it për të zvogëluar ndotjen dhe zhurmën.

Ndërsa disa turistë e shohin mungesën e koshave si një pjesë të veçantë të kulturës japoneze, të tjerë e përjetojnë si shqetësim dhe pengesë gjatë udhëtimit. Rubin Verebes nga Hong Kongu u shpreh se e kishte të bezdisshme të mbante mbeturinat gjatë gjithë ditës pa pasur një vend ku t’i hidhte.

Profesori McMorran shpjegon se japonezët e kanë pranuar këtë “përgjegjësi personale” për mbledhjen dhe riciklimin e mbeturinave, duke krijuar një kulturë të thellë respekti për pastërtinë publike dhe komunitetin.

Përtej arsyeve kulturore dhe etiketës së pastërtisë, një arsye më e errët qëndron pas mungesës së koshave të plehrave në hapësirat publike të Japonisë.

Më 20 mars 1995, anëtarë të kultit apokaliptik Aum Shinrikyo kryen sulme me gaz sarin në disa trena të metrosë së Tokios, duke vrarë 14 persona dhe plagosur të paktën 5,500 të tjerë. Kultistët kishin futur në tren pako plastike me gaz sarin, të cilat i hodhën në dysheme dhe i prenë me cepin e një çadre teksa largoheshin.

Ky sulm tronditi thellë Japoninë dhe ndryshoi përfundimisht masat e sigurisë në vend.

Kjo praktikë nuk është ekskluzive për Japoninë.

Pas një vale sulmesh me bomba nga Ushtria Republikane Irlandeze në vitet 1970, shumë kosha plehrash u hoqën edhe nga stacionet e metrosë në Londër dhe në kryqëzimet kryesore të kryeqytetit britanik.

Për turistët që shqetësohen për mënyrën se si do të menaxhojnë mbeturinat gjatë ditës, ekziston një zgjidhje tradicionale kreative: furoshiki — copa katrore pëlhure që përdoren për të mbështjellë sende.

Pothuajse çdo dyqan suveniresh në Japoni shet furoshiki, duke i dhënë një alternativë funksionale dhe kulturore problemeve moderne.

Japonia e pastër, por pa kosha: Pse rrugët janë të pastra edhe pa mbeturina?

Alketa Rama, Albanian Post

Të fundit

Aktuale