Ushtarët e Misionit të NATO-s, KFOR-it, të enjten, kanë zhvilluar një stërvitje me helikopterë me qëllim rritjen e gatishmërisë operacionale dhe forcimin e koordinimit ndërmjet ekuipazheve ajrore dhe trupave tokësore në Kampin Villaggio në Pejë.

“Përmes këtyre aktiviteteve, të fokusuara në transportin e personelit, evakuimin mjekësor dhe skenarë emergjentë, personeli i KFOR-it ruan ndërgjegjësimin situacional, duke reflektuar përkushtimin e vazhdueshëm të KFOR-it për të siguruar një mjedis të sigurt dhe të qëndrueshëm për të gjithë njerëzit që jetojnë në Kosovë”, thuhet në njoftim.

Nënkryetari i Partisë Demokratike të Kosovës dhe deputeti Uran Ismaili ka ndarë një moment simbolik teksa po udhëtonte nga Haga drejt Prishtinës, duke ndjekur në telefon ndeshjen vendimtare Kosovë–Turqi për kualifikim në Kampionatin Botëror.

Në një postim në rrjete sociale, Ismaili ka theksuar se, pavarësisht rrugës dhe distancës, mendja dhe zemra e tij janë me futbollistët e Kosovës në fushë.

“Rrugës nga Haga në Prishtinë, por me zemër te djelmoshat tanë në fushë. Nuk ka rrugë që i ndalë shqiptarët sot të festojnë ndeshjen historike të Kosovës ”, ka shkruar ai.

Postimi i tij vjen në një moment të rëndësishëm për futbollin kosovar, teksa Kombëtarja synon një arritje historike drejt Botërorit, duke mobilizuar tifozë kudo që ndodhen – në stadium, në shtëpi apo edhe në rrugë.

Në fund të mesazhit të tij, Ismaili ka shtuar thirrjen emocionale: “Hajde shqipeee! ”.

Rama ndalon ekspozimin e mallrave në hapësira publike

Kryetari i Prishtinës, Përparim Rama, ka njoftuar se është marrë vendim për ndalimin e ekspozimit të mallrave në hapësira publike dhe në rrugë.

Rama ka thënë se hapësirat publike janë të qytetarëve, të askujt tjetër.

“Nuk ka më mallra në trotuare. Nuk ka më bllokim të rrugëve. Nuk ka më zënie të hapësirave që u takojnë të gjithëve. Këto hapësira janë për të ecur lirshëm, për fëmijët, për familjet, jo për t’u uzurpuar”, ka shkruar Rama.

Goditen nga vetura dy këmbësore në Suharekë

Dy këmbësore janë goditur nga një veturë në fshatin Shirokë të Suharekës të premten.

Viktimat janë dërguar për trajtim mjekësor në Spitalin e Prizrenit, kurse i dyshuari në mbajtje.

“Ka ndodhë një aksident trafiku, ku i dyshuari mashkull kosovar, me veturën e tij ka goditur dy këmbësore femra. Viktimat kanë pësuar lëndime të rënda trupore dhe janë dërguar në Spitalin e Prizrenit për tretman mjekësor. I dyshuari është arrestuar dhe me vendim të prokurorit është dërguar në mbajtje”, thuhet në raportin e PK-së.